ပြည်ပဈေးကွက်တွင်ပါ ဈေးကောင်းရရှိလာသည့် GW-11 စပါးမျိုးကို တောင်သူများ စိုက်ပျိုးရန် စိတ်ဝင်စားလာ
ပြည်တွင်းစားသုံးမှု ဈေးကွက်တွင်သာမက ပြည်ပသို့တင်ပို့သည့် ဆန်ဈေးကွက်တွင်ပါ ဈေးကောင်းရရှိလာသည့် GW-11 စပါးမျိုးကို တောင်သူများ စိုက်ပျိုးရန် စိတ်ဝင်စားလာကြောင်း စပါးစိုက်တောင်သူများထံမှ သိရသည်။
GW-11 စပါးမျိုးမှာ နွေ၊မိုး နှစ်သီးလုံးစိုက်ပျိုးနိုင်သည့် စပါးမျိုးဖြစ်ပြီး အထွက်နှုန်း တင်း ၁၅၀ ကျော် ထွက်ရှိသဖြင့် လက်ရှိကာလ စိုက်ပျိုးစရိတ်မြင့်မားချိန် တောင်သူများတွက်ခြေကိုက်သည့်အပြင် ပို့ကုန်တန်းမြင့်ဆန်ဈေးကွက်တွင် နာမည်ရ အဝယ်လိုက်လာသည့် တင်း ၁၀၀ ကျပ် ၉သိန်းခွဲမှ ၁၀သိန်းခွဲအကြားရရှိသည့် စပါးမျိုးဖြစ်လာကြောင်း မန္တလေးမြို့ ဂရိတ်ဝေါလ် ကုမ္ပဏီ၏ စိုက်ပျိုးရေး သုတေသနခြံမှ သိရသည်။
ပဲခူးတိုင်းဒေသကြီး၊ ရေတာရှည်မြို့နယ်မှ စပါးစိုက်တောင်သူများသည် လာမည့် မိုးစပါးရာသီတွင် အဆိုပါ GW-11 စပါးမျိုးစိုက်ပျိုးရန် စိတ်ဝင်စားကြသဖြင့် မျိုးစပါးထုတ်လုပ်ဖြန့်ဖြူးသည့် မန္တလေးမြို့ ဂရိတ်ဝေါလ် ကုမ္ပဏီ၏ စိုက်ပျိုးရေး သုတေသနခြံသို့ ဇွန် ၂၅ ရက်နေ့က လာရောက်လေ့လာကြပြီး အလားတူ အခြားသောမြို့နယ်များကလည်း လာရောက်လေ့လာခဲ့ကြသည်ဟု ဂရိတ်ဝေါလ် ကုမ္ပဏီမှ တာဝန်ရှိသူတစ်ဦးက ပြောသည်။
မကြာမီက နေပြည်တော်တွင် GW-11 အထွက်နှုန်းမြင့် မျိုးစပါး စံကွက်ရိတ်သိမ်းမှု အပြီးတွင် စိုက်ပျိုးရေးဦးစီးဌာန၏ ဝန်ကြီးဌာနက စပါးအထွက်နှုန်း တင်း ၁၄၀ ကျော်ထွက်ရှိကြောင်းနှင့် GW-11 စပါးမျိုးမှာ အပင်သက်တမ်း ၁၁၀ ရက် ကြာမြင့်သဖြင့် နွေစပါး၊မိုးစပါး နှစ်မျိုးစလုံး စိုက်ပျိုးနိုင်ကြောင်း၊ အပင်ပေါက်ရာခိုင်နှုန်း မြင့်မားသကဲ့သို့ ပင်ပွှားနှုန်းလည်း ကောင်းမွန်ခြင်းကြောင့် တစ်ဧက အောင်နှံ ၁၂သိန်း၊ အောင်စေ့ရာခိုင်နှုန်း ၈၅ရာခိုင်နှုန်းကျော် ဖြစ်ခြင်းကြောင့် တစ်ဧက အထွက်နှုန်း ၁၅၀-၁၆၀ ကျော်ထွက်ရှိကြောင်း၊ တစ်ဧက စိုက်ပျိုးစရိတ်မှာ ရိတ်သိမ်းသည်အထိ ကျပ် ၄သိန်းကျော်သာ ဒေသစပါးမျိုးများနှင့် အတူတူ ကုန်ကျသော်လည်း စပါးတင်းပိုမိုထွက်ရှိခြင်း စပါးဈေးကောင်း ရရှိခြင်းတို့ကြောင့် တစ်ဧက အကျိုးအမြတ် ငွေကျပ် ၄သိန်းခွဲခန့်ရရှိကြောင်း၊ စနစ်တကျတွက်ချက်ပြီး နေပြည်တော် စိုက်ပျိုးရေးဦးစီးဌာန တိုင်းဦးစီးမှူး က စံကွက်ရိတ်သိမ်းမှုအပြီး ထုတ်ပြန်ထားကြောင်း သိရသည်။
GW-11မျိုးစပါးကို ၂၀၂၁ခုနှစ်တွင် ဧရာဝတီတိုင်းတွင် စတင်ဖြန့်ဖြူးစိုက်ပျိုးခဲ့ပြီး ၂၀၂၂ ခုနှစ်တွင် ပဲခူးတိုင်းအနောက်ပိုင်းတွင် စိုက်ပျိုးခဲ့ရာ တောင်သူများအနေဖြင့် GW-11 မျိုးစပါး ပိုမိုရောင်းချပေးနိုင်ရန် တောင်းဆိုမှုများ ရှိလာကြောင်း၊ ယခုနှစ်တွင် GW—11 စပါးစိုက်ပျိုးဧက ၂သိန်း၅သောင်း အတွက် မျိုးစပါးရရှိရေးအတွက် နွေစပါး ၊မိုးစပါး နှစ်သီးစိုက်ပျိုးပြီး ထုတ်လုပ်ပေးနေကြောင်း၊ လာမည့် ၂၀၂၅ ခုနှစ်တွင် GW-11 စပါးမျိုး ဧက ၆သိန်း စိုက်ပျိုးနိုင်ရန် မျိုးထုတ်လုပ်သွားမည်ဖြစ်ကြောင်း၊ ယခင်က နေပြည်တော်တွင် ဧက ၈၀၀၊ ပဲခူးတိုင်းအုတ်တွင်း တွင် ဧက ၄၀၀ ကို နွေစပါး၊မိုးစပါး စိုက်ပျိုးပြီး မျိုးစပါးထုတ်လုပ်ခဲ့ရာ GW—11 စပါးစိုက်ဧက ၁၂၀၀၀၀ အတွက် ဖြန့်ဖြူးနိုင်ခဲ့ကြောင်း ဂရိတ်ဝေါလ်ကုမ္ပဏီ အုပ်ချုပ်မှုဒါရိုက်တာ ဦးတင်မောင် က ပြောသည်။
ထို့ပြင် ပဲခူးတိုင်း ရေတာရှည်မြို့နယ်မှ လာရောက်လေ့လာသည့် တောင်သူများကို ပုသိမ်ကြီးမြို့နယ်အတွင်း GW-11 စပါးမျိုးများ ထုတ်လုပ်နေမှုများနှင့် အဲဗားဂရင်းမြက်နှင့် ပြည်လုံးချမ်းသာ ရောနှောသစ်တောစိုက်ခင်း စိုက်ပျိုးထားရှိမှုကိုလည်း ရှင်းလင်းပြသခဲ့ပြီး စစ်ကိုင်းမြို့ စက်မှုဇုံရှိ အထပ်သားထုတ်လုပ်နေမှု၊ သြဂဲနစ်ကွန်ပေါင်းဓာတ်မြေသြဇာ ထုတ်လုပ်နေမှုများကို သွားရောက်လေ့လာခဲ့ကြောင်း သိရသည်။
ရွှေနွယ်ကြိုး
Original works by PaukPhaw@PaukPhaw Network: http://www.paukphaw.org/2022/06/28/%e1%80%95%e1%80%bc%e1%80%8a%e1%80%ba%e1%80%95%e1%80%88%e1%80%b1%e1%80%b8%e1%80%80%e1%80%bd%e1%80%80%e1%80%ba%e1%80%90%e1%80%bd%e1%80%84%e1%80%ba%e1%80%95%e1%80%ab-%e1%80%88%e1%80%b1%e1%80%b8%e1%80%80/
WeChat PaukPhaw 
