တရုတ်နိုင်ငံမှ ပံ့ပိုးပေးသည့် ကွမ်းလုံတံတားသစ် အရန်တံတားစီမံကိန်း လွှဲပြောင်း
တရုတ်နိုင်ငံမှ မြန်မာနိုင်ငံသို့ ပံ့ပိုးကူညီတည်ဆောက်ပေးသည့် ကွမ်းလုံတံတားသစ် အရန်တံတားစီမံကိန်း လွှဲပြောင်းလက်ခံရေးအခမ်းအနားကို စက်တင်ဘာလ ၇ ရက်နေ့တွင် Video Conferencing ဖြင့် ကျင်းပခဲ့သည်။
အခမ်းအနားသို့ မြန်မာနိုင်ငံ ဆောက်လုပ်ရေးဝန်ကြီးဌာန ဒုတိယဝန်ကြီး ဦးဝင်းဖေ၊ မြန်မာနိုင်ငံဆိုင်ရာတရုတ်သံရုံး စီးပွားရေးသံမှူး Mr. Tan Shufu ၊ ယူနန်ပြည်နယ် လင်ချန်းမြို့ပါတီကော်မတီ အတွင်းရေးမှူး Mr. Zhang Zhizheng နှင့် တာဝန်ရှိသူများ တက်ရောက်ကြသည်။
မြန်မာနိုင်ငံကို ပံ့ပိုးကူညီတည်ဆောက်ပေးသည့် ကွမ်းလုံတံတားစီမံကိန်းသည် ၂၀၂၀ ပြည့်နှစ် ဇန်နဝါရီလက သမ္မတကြီး Mr. Xi Jinping မြန်မာနိုင်ငံကို ခရီးစဉ်လာရောက်စဉ်အတွင်း တရုတ်-မြန်မာ နှစ်ဦးနှစ်ဖက်အကြား ထားရှိခဲ့သည့် အရေးကြီးပူးပေါင်းဆောင်ရွက်မှုရလဒ်များထဲမှ တစ်ခု ဖြစ်ပြီး တရုတ်-မြန်မာ ဆွေမျိုးပေါက်ဖော်ချစ်ကြည်ရေးကို ထင်ဟပ်နေသော စီမံကိန်းဖြစ်ကြောင်း မြန်မာနိုင်ငံဆိုင်ရာတရုတ်သံရုံး စီးပွားရေးသံမှူး Mr. Tan Shufu ကပြောကြားသည်။
ဆက်လက်ပြီး စီးပွားရေးသံမှူးက တရုတ်-မြန်မာနှစ်ဦးနှစ်ဖက်၏ အတူတကွကြိုးပမ်းမှုအောက်တွင် မြန်မာနိုင်ငံကို ပံ့ပိုးကူညီ တည်ဆောက်ပေးသည့် ကွမ်းလုံတံတားသစ် အရန်တံတား၏ အခန်းကဏ္ဍကို အပြည့်အဝ ဖော်ထုတ်နိုင်ပြီး မြန်မာနိုင်ငံကို ပံ့ပိုးကူညီတည်ဆောက်ပေးသည့် ကွမ်းလုံတံတားစီမံကိန်းကို အဆင်ပြေချောမွေ့စွာ တွန်းအားပေးဆောင်ရွက်နိုင်ရန်၊ မြန်မာနိုင်ငံ ရှမ်းပြည်နယ်မြောက်ပိုင်းနှင့် တရုတ်နိုင်ငံ ယူနန်ပြည်နယ် နယ်စပ်ဒေသ၏ လမ်းပန်းဆက်သွယ်ရေးနှင့် ထောက်ပံ့ပို့ဆောင်ရေး အခြေအနေများ များစွာကောင်းမွန် တိုးတက်လာစေရန် ဆောင်ရွက်လာနိုင်ကာ တရုတ်-မြန်မာ နယ်စပ်ကုန်သွယ်ရေး အရည်အသွေးမြှင့်တင်နိုင်ရန် အားဖြည့်ပေးပြီး တရုတ်-မြန်မာနယ်စပ်ဒေသ တည်ငြိမ်ဖွံ့ဖြိုးတိုးတက်ရေးကို မြှင့်တင်ပေးနိုင်မည်ဟု ယုံကြည်ကြောင်း ပြောကြားသည်။
ဆောက်လုပ်ရေးဝန်ကြီးဌာန ဒုတိယဝန်ကြီး ဦးဝင်းဖေက တရုတ်နိုင်ငံမှ ပံ့ပိုးကူညီ တည်ဆောက်ပေးသည့်အတွက် ကျေးဇူးတင်ရှိကြောင်း၊ ကွမ်းလုံတံတားသစ် အရန်တံတားကို နှစ်နိုင်ငံ သက်ဆိုင်ရာဌာနများမှ စစ်ဆေးလက်ခံမှု ပြီးစီးပြီဖြစ်ကြောင်း၊ ကွမ်းလုံတံတားသစ် တည်ဆောက်ရေးစီမံကိန်း မပြီးစီးမီ တည်ဆောက်ရေးနေရာတွင် အရန်တံတားကို အသုံးပြုနိုင်ခြင်းဖြင့် သယ်ယူ ပို့ဆောင်ရေးလုပ်ငန်းများ ဘေးကင်းလုံခြုံရေး၊ ကုန်စည်စီးဆင်းမှုများ လွယ်ကူလျင်မြန်စေရေးနှင့် တရုတ်-မြန်မာ နှစ်နိုင်ငံနယ်စပ်ဒေသ၏ စီးပွားရေး၊ လူမှုရေး ဖွံ့ဖြိုးတိုးတက်ရေးအတွက် အထောက်အကူဖြစ်စေမည် ဖြစ်ကြောင်း ပြောကြားပါသည်။
ယူနန်ပြည်နယ် လင်ချန်းမြို့ပါတီကော်မတီ အတွင်းရေးမှူး Mr. Zhang Zhizheng က တရုတ်-မြန်မာနှစ်နိုင်ငံမှ စီးပွားရေးလုပ်ငန်းရှင်များက တရုတ်-မြန်မာလမ်းကြောင်းသစ် အပြန်အလှန် ကွန်တိန်နာဖြင့် ကုန်စည်သယ်ယူပို့ဆောင်ရေးလုပ်ငန်းများကို အတူတကွ ဆောင်ရွက်လျက်ရှိကြောင်း၊ အရန်တံတားကို ဆောလျင်စွာ အသုံးပြုနိုင်ပါက လမ်းကြောင်း၏ သယ်ယူပို့ဆောင်မှု ဘေးကင်းလုံခြုံရေးနှင့် အဆင်ပြေချောမွေ့စေရေးကို ထိရောက်စွာ အာမခံချက်ပေးနိုင်ပြီး နှစ်ဦးနှစ်ဖက်အကြား စီးပွားကုန်သွယ်ရေး ပူးပေါင်းဆောင်ရွက်ရေးနှင့် ချစ်ကြည်ရင်းနှီးမှုဆက်ဆံရေး ပိုမိုမြှင့်တင်နိုင်ရေးအတွက် များစွာအရေးပါလှကြောင်း ပြောကြားခဲ့သည်။
အခမ်းအနားတွင် ကွမ်းလုံတံတားသစ် အရန်တံတား စစ်ဆေးလက်ခံရေးကော်မတီဝင်များမှ စီမံကိန်းပြီးစီးမှုနှင့်ပတ်သက်၍ ပူးတွဲစစ်ဆေးမှုဆိုင်ရာမှတ်တမ်းကို လက်မှတ်ရေးထိုးခဲ့ကြသည်။
မြသုခ
၎
င
၎
၎
Original works by shin@PaukPhaw Network: http://www.paukphaw.org/2022/09/09/%e1%80%90%e1%80%9b%e1%80%af%e1%80%90%e1%80%ba%e1%80%94%e1%80%ad%e1%80%af%e1%80%84%e1%80%ba%e1%80%84%e1%80%b6%e1%80%99%e1%80%be-%e1%80%95%e1%80%b6%e1%80%b7%e1%80%95%e1%80%ad%e1%80%af%e1%80%b8%e1%80%95/