ဖရဲ၊ သခွား ရာသီကုန်ချိန်ရောက်ပြီဖြစ်၍ တရုတ်ဈေးကွက်တွင် ဈေးကောင်းရ

ပြည်တွင်းမှ ဖရဲ၊ သခွားများကို တရုတ်ဈေးကွက်သို့ တင်ပို့လျက်ရှိရာ ရာသီကုန်ချိန် ရောက်ရှိပြီဖြစ်၍ ဈေးကောင်းရနေပြီး အစီးလိုက်ပြတ်ဈေးမှာ တရုတ်ယွမ်ငွေ ၉၀၀၀၀ အထိရရှိနေကြောင်း မူဆယ် ၁၀၅ မိုင် သစ်သီး၀လံဈေးကွက်မှသိရသည်။

ဖရဲ၊သခွားမှာ ရာသီကုန်ချိန် ဖြစ်၍ ရှားပါးလာသောကြောင့် မူဆယ် ၁၀၅ မိုင်သို့ ဝင်ထွက်သည့် သစ်သီးကားများမှာ မတ်လဒုတိယပတ်နောက်ပိုင်းတွင် တစ်ရက်လျှင် အစီးရေ ၉၀ ဝန်းကျင်သာရှိကာ လျော့နည်းသွားသည်ဟု ဆိုသည်။

“ဖရဲ၊သခွားတွေက ရှမ်းပြည်ဘက်က နောက်ဆုံးထွက်တဲ့ အသီးတွေ ဈေးကွက်ရောက်လာတယ်။ ရာသီချိန်ကုန်ပြီဖြစ်လို့ မတ်လဆန်းက တစ်ရက်ကို သစ်သီးကား အစီးရေ ၁၅၀ ဝန်းကျင်လောက် ဝင်ရောက်ပေမယ့် ခုနောက်ပိုင်း အစီးရေ နည်းလာတယ်” ဟု မူဆယ် ၁၀၅ မိုင်ကုန်စည်ဒိုင်မှ တာဝန်ခံ ဒေါ်ရီရီက ပြောသည်။

တရုတ်ဈေးကွက်၌ မတ် ၂၅ ရက်က ဖရဲသီး ၈၅၅ မှာ အစီးပြတ်ဈေးနှုန်းမှာ ယွမ် ၇၀၀၀၀ ကျော်နှင့် ထန်ဝမ့်အသီးမှာ တစ်ကီလိုလျှင် ၆ ဒသမ ၅ ယွမ်၊ သခွားမှာ ၈ ဒသမ ၂ ယွမ် ပေါက်ဈေးရှိခဲ့ပြီး ၂၉ ရက်တွင် ဖရဲသီး ၈၅၅ မှာ အစီးပြတ် ယွမ် ၉၀၀၀၀ နှင့် ထန်ဝမ့် အသီးမှာ တစ်ကီလိုလျှင် ၈ ဒသမ ၅ ယွမ်၊ ရွှေသခွားမှာ ၈ ဒသမ ၂ ယွမ် ပေါက်ဈေးရှိကာ ဈေးကောင်းရနေသည်။

တရုတ်-မြန်မာ နယ်စပ် ကုန်သွယ်ရေးဂိတ်များ ပြန်လည် ဖွင့်လှစ်ပြီး သစ်သီးကားများ၊ ရေထွက်ပစ္စည်းများ၊ ကြံ စသည်တို့မှာ တိုက်ရိုက်တင်ပို့ရောင်းချနိုင်ခြင်း နှင့် စစ်ဆေးမှုများ လျှော့ပေါ့ခြင်း တို့ကြောင့် နယ်စပ်ကုန်သွယ်မှုတွင် ယခင်ထက် မြန်ဆန်လာကြောင်း သိရသည်။

“တရုတ်ဈေးကွက်မှာ ဖရဲ၊ သခွားတင်ပို့ရင် အရည်သွေး ကောင်းဖို့လိုသလို နယ်စပ်ဖြတ်ကျော်မှုမှာ ကြန့်ကြာရင်လည်း အသီးတွေက အရည်အသွေးကျသွားနိုင်တယ်။ ဈေးမကိုက်ဘူးဆိုပြီး ပြန်သယ်လို့လည်း မဖြစ်တဲ့ ကုန်စိမ်းဖြစ်တော့ ထိခိုက်ဆုံးရှုံးမှုက ကြီးမားတယ်”ဟု မူဆယ် ၁၀၅ မိုင်မှ ဖရဲ၊ သခွားပွဲရုံပိုင်ရှင် တစ်ဦးက ပြောသည်။

ရွှေနွယ်ကြိုး

Original works by shin@PaukPhaw Network: http://www.paukphaw.org/2023/04/09/%e1%80%96%e1%80%9b%e1%80%b2%e1%81%8a-%e1%80%9e%e1%80%81%e1%80%bd%e1%80%ac%e1%80%b8-%e1%80%9b%e1%80%ac%e1%80%9e%e1%80%ae%e1%80%80%e1%80%af%e1%80%94%e1%80%ba%e1%80%81%e1%80%bb%e1%80%ad%e1%80%94%e1%80%ba/