မြန်မာ-တရုတ်ကုမ္ပဏီ၁၇ခုသဘောတူစာချုပ်လက်မှတ်ရေးထိုး

မြန်မာ-တရုတ် နှစ်နိုင်ငံကုမ္ပဏီ ၁၇ ခုမှ ကုန်သွယ်မှုဆိုင်ရာသဘောတူစာချုပ် ၉ ခု လက်မှတ်ရေးထိုး

မြန်မာ-တရုတ် နှစ်နိုင်ငံကုမ္ပဏီ ၁၇ ခုမှ ပူးပေါင်းဆောင်ရွက်ရေးနှင့် ကုန်သွယ်မှုဆိုင်ရာသဘောတူစာချုပ် စုစုပေါင်း ၉ ခုကို မြန်မာ(နေပြည်တော်) – တရုတ်(လင်ချန်း) စီးပွားရေး ကုန်စည်ပြပွဲတွင် လက်မှတ်ရေးထိုးခဲ့ကြကြောင်း သိရသည်။

မေလ ၂၆ ရက်နေ့ နံနက် ၉ နာရီခွဲတွင် မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန – ၂ ရှိ Plenary Hall ၌ ကျင်းပသည့် မြန်မာ – တရုတ် စီးပွားရေးနှင့်ကုန်သွယ်မှုဆိုင်ရာ ပူးပေါင်းဆောင်ရွက်မှုဆွေးနွေးပွဲနှင့် လက်မှတ်ရေးထိုးပွဲအခမ်းအနားတွင် လက်မှတ်ရေးထိုးခဲ့ကြခြင်းဖြစ်သည်။

နှစ်နိုင်ငံမှကုမ္ပဏီ ၁၇ ခုသည် လယ်ယာထွက်ကုန်ပစ္စည်း၊ စားသောက်ကုန်ပစ္စည်း၊ အချိုရည်နှင့် အဖျော်ယမကာ၊ ဆေးဝါးပစ္စည်း၊ အိမ်သုံးလျှပ်စစ်ပစ္စည်းနှင့် လျှပ်စစ်သုံးမော်တော် ယာဉ်များစသည့် နယ်ပယ်များတွင် ပူးပေါင်းဆောင်ရွက်ရေးနှင့် ကုန်သွယ်မှုဆိုင်ရာသဘောတူစာချုပ် ချုပ်ဆိုခဲ့ကြသည်။

အဆိုပါ အခမ်းအနားတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန မြန်မာကုန်သွယ်မှုမြှင့်တင်ရေးအဖွဲ့ ညွှန်ကြားရေးမှူးချုပ် ဒေါ်နော်မူတာကပေါ၊ တရုတ်ပြည်သူ့သမ္မတနိုင်ငံသံရုံးမှ စီးပွားရေးသံမှူး Mr. Tan Shufu၊ လင်ချန်းမြို့ စီးပွားရေးဌာန ညွှန်ကြားရေးမှူး Mr.Zhou Yongzhi တို့က အဖွင့်အမှာစကားများပြောကြားခဲ့ကြသည်။

တရုတ်နိုင်ငံသည် မြန်မာနိုင်ငံ၏ အကြီးဆုံးကုန်သွယ်ဖက်နိုင်ငံဖြစ်ပြီး မြန်မာနိုင်ငံ၏ ထိပ်တန်းနိုင်ငံခြားရင်းနှီးမြှုပ်နှံသည့်နိုင်ငံများထဲမှာ တစ်ခုဖြစ်သကဲ့သို့ မြန်မာနိုင်ငံ၏ အကြီးမားဆုံး ပို့ကုန်တင်ပို့ရသည့် ဈေးကွက်လည်းဖြစ်ကြောင်း၊ လယ်ယာစိုက်ပျိုးရေးနှင့် ထုတ်လုပ်မှုနှင့် ဖလှယ်ရေးစသည့် ကဏ္ဍများတွင် ပူးပေါင်းဆောင်ရွက်နိုင်ရန် နှစ်နိုင်ငံအတွက် အခွင့်အလမ်းများစွာရှိကြောင်းလည်း စီးပွားရေးသံမှူး Mr. Tan Shufu က အဖွင့်အမှာစကားတွင် ထည့်သွင်းပြောကြားခဲ့သည်။

ဆက်လက်ပြီး မြန်မာ – တရုတ်နှစ်နိုင်ငံမှ ကုမ္ပဏီများကနှစ်နိုင်ငံ ကုန်သွယ်ရေးပူးပေါင်းဆောင်ရွက်နိုင်မည့် အခြေအနေများကို ဆွေးနွေးတင်ပြခဲ့ကြကြောင်း သိရသည်။

ကောင်းကောင်း

Original works by shin@PaukPhaw Network: http://www.paukphaw.org/2023/05/29/%e1%80%99%e1%80%bc%e1%80%94%e1%80%ba%e1%80%99%e1%80%ac-%e1%80%90%e1%80%9b%e1%80%af%e1%80%90%e1%80%ba%e1%80%80%e1%80%af%e1%80%99%e1%80%b9%e1%80%95%e1%80%8f%e1%80%ae%e1%81%81%e1%81%87%e1%80%81%e1%80%af/