လားရှိုးမြို့၊ စန်းရွှင်ဟိုတယ်ရှေ့တွင် ပေါက်ကွဲမှုဖြစ်ပြီး ပြည်သူ ၂ ဦးဒဏ်ရာရ

ရှမ်းပြည်နယ်(မြောက်ပိုင်း)၊ လားရှိုးမြို့၊ ရပ်ကွက်(၇)၊ နယ်မြေ(၁၁)၊ သုခလမ်းရှိ စန်းရွှင်ဟိုတယ်ရှေ့တွင် ဖေဖော်ဝါရီလ ၇ ရက်နေ့ ညနေ ၄ နာရီ ၄၅ မိနစ်အချိန်ခန့်၌ ပေါက်ကွဲမှုဖြစ်ပွားပြီး ပြည်သူ ၂ ဦး ထိခိုက်ဒဏ်ရာ ရခဲ့ကြောင်းသိရသည်။

အဆိုပါပေါက်ကွဲမှုသည် KIO/ KIA အကြမ်းဖက်အဖွဲ့မှ အမျိုးသား ၂ ဦးသည် ဆိုင်ကယ်ဖြင့် ဟိုတယ်ရှေ့သို့ ရောက်လာပြီး ဆိုင်ကယ်အား ဟိုတယ်ရှေ့လမ်းဘေးတွင် ရပ်ထားခဲ့ကာ ၎င်းတို့ ပြန်လည် ထွက်ခွာသွားပြီး မကြာမီ အဆိုပါဆိုင်ကယ်မှ မိုင်းပေါက်ကွဲမှုဖြစ်ပွားခဲ့ခြင်းဖြစ်ကြောင်း သတင်းများက ဖော်ပြထားသည်။

ပေါက်ကွဲမှုကြောင့် အဆိုပါဟိုတယ်မှ လုံခြုံရေးဝန်ထမ်းဖြစ်သူ ဦးဆေးပလယ် (၂၇) နှစ်တွင် ယာလက်ကောက်ဝတ် မိုင်းစထိမှန်ဒဏ်ရာ (၁) ချက်နှင့် ဟိုတယ်ရှေ့မှ ဖြတ်သန်းသွားလာသူ မချောစုအောင် (၁၈) နှစ်တွင် လည်ပင်းအရှေ့ ဖောက်ဝင်ဒဏ်ရာ (၁) ချက်၊ ဝဲဘက်ညိုသကြီး ဖောက်ဝင်ဒဏ်ရာ (၁) ချက်တို့ရရှိခဲ့သဖြင့် ဆေးကုသမှုခံယူလျက် ရှိကြောင်း သိရသည်။

KIO/ KIA အကြမ်းဖက်အဖွဲ့က ဖေဖော်ဝါရီလ ၃ ရက်နေ့ရက်စွဲဖြင့် အဆိုပါမိုင်းပေါက်ကွဲမှုဖြစ်ပွားခဲ့သည့် စန်းရွှင်ဟိုတယ်သို့လိပ်မူပြီး ၎င်းတို့ထံ ဖေဖော်ဝါရီလ ၅ ရက်နေ့မတိုင်မီ ဆက်ကြေးအား မပျက်မကွက် လာရောက်ပေးသွင်းရန်နှင့် မပေးပါက ပြင်းထန်စွာအရေးယူမည်ဟု ခြိမ်းခြောက်ရေးသားထားသော ဆက်ကြေးကောက်ခံသည့် အကြောင်းကြားစာအားလာရောက်ပေးပို့ခဲ့ပြီး ဟိုတယ်မှ ပေးသွင်းခြင်းမရှိသဖြင့် ယခုကဲ့သို့ အကြမ်းဖက်မိုင်းထောင်ဖောက်ခွဲခဲ့ခြင်းဖြစ်ကြောင်း သတင်းဖော်ပြမှုများအရ သိရသည်။

ကိုစိုင်း (မူဆယ်)

၎

င

၎

Original works by shin@PaukPhaw Network: http://www.paukphaw.org/2024/02/08/%e1%80%9c%e1%80%ac%e1%80%b8%e1%80%9b%e1%80%be%e1%80%ad%e1%80%af%e1%80%b8%e1%80%99%e1%80%bc%e1%80%ad%e1%80%af%e1%80%b7%e1%81%8a-%e1%80%85%e1%80%94%e1%80%ba%e1%80%b8%e1%80%9b%e1%80%bd%e1%80%be%e1%80%84/