မန္တလေးတောင်ပန်းချီပြခန်းတွင် ပန်းချီဆရာခင်မောင်ညို၏ တစ်ကိုယ်တော် “ရသရနံ့ “ပန်းချီပြပွဲ ၅ရက်ကြာ ကျင်းပမည်
ချင်းတွင်းရေကြည် ပန်းချီဆရာ ခင်မောင်ညို၏ တစ်ကိုယ်တော် “ရသရနံ့” အမည်ရှိ ပန်းချီပြပွဲကို မန္တလေးမြို့၊ အောင်မြေသာစံမြို့နယ် မန္တလေးတောင်ခြေရှိ မန္တလေးတောင်ပန်းချီပြခန်းတွင် ဇူလိုင်လ ၁ ရက်မှ ၅ ရက်နေ့အထိ ၅ရက်ကြာ ခင်းကျင်းပြသသွားမည်ဖြစ်ကြောင်းသိရသည်။
“ပန်းချီနဲ့ ပတ်သက်ပြီး အနုပညာခံစားတတ်အောင် ပြပွဲနာမည်ကို “ရသရနံ့”လို့ ပေးဖြစ်တာပါ” ဟု ပန်းချီဆရာ (ဦး)ခင်မောင်ညိုကပြောသည်။
ပြုလုပ်မည့်ပန်းချီပြပွဲသည် ပန်းချီဆရာ (ဦး)ခင်မောင်ညို၏ ပထမဆုံးတစ်ကိုယ်တော်ပြပွဲဖြစ်ပြီး ၃ပေ×၂ပေ မှ ၁၀လက်မ×၁၂လက်မ အရွယ် ရေဆေးနှင့် အခရိုင်းလစ် ပန်းချီလက်ရာပေါင်း(၇၀)ကျော် ပြသ ရောင်းချပေးသွားမည်ဖြစ်ကြောင်းသိရသည်။
လွန်ခဲ့သည့် နှစ် ၅၀ ခန့် (၁၉၇၄)ခုနှစ်မှစ၍ မုံရွာမြို့၊ ရတနာပုံရပ်တွင် ကိုယ်ပိုင်ပန်းချီလုပ်ငန်းဖြင့် စတင်ခဲ့သော ဆရာ(ဦး)ခင်မောင်ညို သည် ရန်ကုန်-မန္တလေး ပန်းချီပန်းပုပြပွဲကြီးများ၊ အုပ်စုလိုက်ပန်းချီပြပွဲများ၊ ချင်းတွင်းရေကြည် ရေဆေးပန်းချီပြပွဲများတွင် ပါဝင်ပြသခဲ့သူတစ်ဦးဖြစ်သည်။။
ယခင်က မုံရွာမြို့တွင် ကိုယ်ပိုင်ပန်းချီသင်တန်း ဖွင့်လှစ်ခဲ့သကဲ့သို့ ကိုယ်ပိုင်အထက်တန်းကျောင်းများတွင် အချိန်ပိုင်းပန်းချီနည်းပြ လုပ်ခဲ့ကြောင်းသိရသည်။
ဆရာခင်မောင်ညိုသည် မုံရွာမြို့ နေဝင်းရုပ်ရှင်ရုံ ပန်းချီဆရာကြီး ဦးတင်မောင်၊ အ-လ-က-၂ ပန်းချီဆရာကြီး ဦးညွန့်ခင်၊ အ-ထ-က (၁) ပန်းချီဆရာကြီး ဦးသိန်းလှိုင်၊ ပန်းချီဆရာကြီး ဦးဘတိုး၊ ပန်းချီဆရာကြီး ဦးဘမိုး(ရန်ကုန်) တို့ထံတွင် ပန်းချီပညာသင်ယူခဲ့ကြောင်း သိရသည်။
စျာန်ထူးကို
Original works by shin@PaukPhaw Network: http://www.paukphaw.org/2023/06/30/%e1%80%95%e1%80%94%e1%80%ba%e1%80%b8%e1%80%81%e1%80%bb%e1%80%ae%e1%80%86%e1%80%9b%e1%80%ac%e1%80%81%e1%80%84%e1%80%ba%e1%80%99%e1%80%b1%e1%80%ac%e1%80%84%e1%80%ba%e1%80%8a%e1%80%ad%e1%80%af%e1%81%8f/