တရုတ်ကျောင်းသားများ မြန်မာသံရုံးသို့ သွားရောက်လေ့လာပြီး ယဉ်ကျေးမှုဖလှယ်
တရုတ်နိုင်ငံတစ်ဝှမ်းရှိ အသက် ၇ နှစ်မှ ၁၅ နှစ်ထိ မူလတန်း-အလယ်တန်း ကျောင်းများမှ ကျောင်းသားကလေးငယ်များ လာရောက် လေ့လာသည့် ယဉ်ကျေးမှုဖလှယ်ပွဲကို ပေကျင်းမြို့ရှိ တရုတ်နိုင်ငံ မြန်မာသံရုံး၌ ဇူလိုင်လ ၇ ရက်နေ့ ညနေပိုင်းက ကျင်းပခဲ့ကြောင်း သိရသည်။
အဆိုပါအစီအစဉ်အား မြန်မာ-တရုတ် ပြည်သူများအကြား ချစ်ကြည်ရင်းနှီးမှုကို ဖော်ဆောင်သည့် အနေဖြင့် တရုတ်နိုင်ငံ၊ ယဉ်ကျေးမှုဝန်ကြီးဌာနလက်အောက်ရှိ International Cultural Exchange Programme အစီအစဉ်ဖြင့် ပြုလုပ်ခဲ့ခြင်းဖြစ်ပြီး မြန်မာ-တရုတ်နှစ်နိုင်ငံပြည်သူများအကြား ချစ်ကြည်ရေး ထိတွေ့ဆက်ဆံ ဖလှယ်မှုများ၊ ပညာရေးဆိုင်ရာ ပူးပေါင်းဆောင်ရွက်မှုများ၊ ယဉ်ကျေးမှု ဖလှယ်မှုများ ဖွံ့ဖြိုးတိုးတက်စေရေးအတွက် ရည်ရွယ်လျက် ကျင်းပခဲ့ခြင်းဖြစ်ကြောင်း သိရသည်။
ယဉ်ကျေးမှုဖလှယ်ပွဲတွင် သံအမတ်ကြီးမှ နှုတ်ခွန်းဆက် အမှာစကား ပြောကြားခဲ့ပြီး မြန်မာသံရုံး၏ တာဝန်ရှိသူမှ တရုတ်ကျောင်းသားကလေးငယ်များအား မြန်မာနိုင်ငံ အကြောင်း ရှင်းလင်းပြောကြားခြင်း၊ မြန်မာသံရုံးနှင့် မြန်မာစစ်သံရုံး (ကြည်း/ရေ/လေ) မိသားစုဝင်များ၏ မြန်မာကျောင်းသားကလေးငယ်များမှလည်း မြန်မာတေးသီချင်းဖြင့် သီဆိုကပြဖျော်ဖြေခြင်း၊ မြန်မာနိုင်ငံနှင့် စပ်လျဉ်းသည့် ဗဟုသုတ အမေးအဖြေများ မေးမြန်းခြင်း၊ ဂုဏ်ပြုမှတ်တမ်းလွှာများ ပေးအပ်ခြင်းများ ပြုလုပ်ခဲ့ပြီး၊ မြန်မာ-တရုတ် ကျောင်းသားကလေးငယ်များအကြား ချစ်ခင်ရင်းနှီးစွာ ယဉ်ကျေးမှုဖလှယ်ခြင်းများ ပြုလုပ်ခဲ့ကြောင်း သိရသည်။
မြသုခ
Original works by shin@PaukPhaw Network: http://www.paukphaw.org/2023/07/14/%e1%80%90%e1%80%9b%e1%80%af%e1%80%90%e1%80%ba%e1%80%80%e1%80%bb%e1%80%b1%e1%80%ac%e1%80%84%e1%80%ba%e1%80%b8%e1%80%9e%e1%80%ac%e1%80%b8%e1%80%99%e1%80%bb%e1%80%ac%e1%80%b8-%e1%80%99%e1%80%bc%e1%80%94/